horas

HORAS..!
Jolo tiniktik sanggar laho bahenon huru-huruan,
Jolo sinukkun marga asa binoto partuturan.
Manuk ni pealangge hotek-hotek laho marpira
Sirang na mar ale-ale, lobianan matean ina.
Rabba na poso, ndang piga tubuan lata
Hami na poso, ndang piga na umboto hata

Jumat, 03 Juni 2011

PAJONGJONG RUMA DOHOT SOPO

Dari Catatan : Raja Pinantun Ompu Sumatti Sinambela, 8 Nov 1979

Goargoar ni parhau dohot hasea naasing di na parait tiang :
Basiha, ransang, pantar, tohang, tinombuk, ungalungal, nalumiun, naga-naga, untul-untul, buaton, sundalap (tedek-tedek), tustus parbarat, gulang-gulang, solang-solang, lapik-lapik, parbatu ni tiang, balatuk, tangga godang.

Goar-goar ni parhau di namandingding :
Ture-ture, pandingdingan, dorpi jolo, parhongkong, bohi ni jabu, sande-sande, tomboman adop-adop, jenggar, songsong boltok, song-song rak, halang gordang, ulu gurdung (gurdong), pantar ginjang, ulu paung, songkir.
Goaroar ni parhau dohot hasea naasing di namangarait tarup :
Ninggor, sitindangi, sibarati, sijongjongi, sitindangi ni santung-santung, sibongbong ari, pusu-pusu ni santung-santung, santung-santung, bungkulan, tomboman, tali janggut/pangurat, sangge, sendal, ampu sendal, pandalu, pamoltok, urur, patar, parjenggaran, laislais, tuhamtuham, tarup.
Goargoar ni ijuk di namanarup :
Tuhamtuham nanirahut, lambak-lambak nanirigatan, laislais ni hodong naniaris, sangge-sangge napinahibul, ijuk naniubanan, tali ijuk napiniu.
Goargoar ni uhir ni ruma dohot sopo :
Uhir : pardesaan, gaja dompak, tumtuman, sibagandingtua dlna.
Goargoar ni gorga Batak :
Gorga sipalang = gumodang gorga narara.
Gorga Sijonggi = gumodang gorga nabirong
Gorga Silintong = gumodang gorga nabontar
Suhatsuhat di Hatungkangon :
Sadopa, sangkolak, saasta, sansuhat, sanjongkal, sanjongkal tunduk, sagala, sajari,,santopap, saelak. Contoh : Balga ni sabu/sopona I, lima dopa onom suhat = lima dopa + saganjang ni pargolangan ni nampuna ruma/sopo i. Anak ni suhat-suhat : pargolangan, sibosur, pargadingan, abara, andora/siporjat.
Goargoar ni parhau tu sopo na so adong di ruma :
Galapang, pantar ni langit-langit, tangga morot.
HATUNGKANGON, ULAULANA DOHOT RUHUTRUHUTNA.
Goli-goli di ulaon hatungkangon di napalolo ruma manang sopo :
Mangarasras, mangaritipi, mangarungkungi, mamasi, manghias, hombang bohi, barbar lamot, barbrar parsisik ni ihan, manuhili, mangarait, mamortok, mangaris, mangaransang, mamoltok, mangarusuk, mamantar, dlna.
Parhohas ni pande ruma/sopo :
Laholaho, pasak-pasak, umban-umban, tumbur-tumbur, tuham-tuham, tangke, jarbang, baliung, goluk, hortuk, tuhil, rambuan, piuan tali, suri ijuk, jarum ijuk, garut, pungga, gatip, songkir, batuan, bonggas, panastas, parapian, titipan, rabi, dlna.
Marhara/marsirumpa (gotongroyong) ;
- pahimpu parhau, tarup, dalna.
- panggonghonon di angka pande (tukang).
- mambarbar, manuhili, manghias, dlna.
- paraithon ti tiang.
- panangkokhon pandingdingan, dlna.
- paraithon urur, bungkulan dlna.
- manarup, manguhir, dlna.
- pamulilon tukang, paborhathon indahan tompi-tompi.
Turisa najempek na gabe tudosan na mardomu tu balatuk/tangga :
- Sitaon nahansit ala sipadegedegeon.
- Nabenget manaon angka hatahata.
- Sordit umboto sude angka namasa.
- Sige laho tu ginjang, tantan laho tu toru.
- Patanda habaranion di naboi parumpak balatuk ni musu.
- Tanda na saut mamuhar jabu, boanon ma balatukna.
- Balatuk do raja ni jabu, ai molo so adong i sisoada do jabu i.
Bagian depan�ruma Ruma dan�sopo Assesori Sopo dan Ruma�1 Assesori Sopo dan Ruma�2 habis�fungsi Bersanding
Sian goargoaran ni parhau ni ruma dohot sopo, nania do dienet bahen umpama dohot umpasa ;
Umpama.
1. Sijujung ni ninggor sitingos ni ari.
2. Pinahot ni sitindangi dohot sijongjongi.
3. Ndang boi sibongbongari manmgholipi nahinilang.
4. Ndang tartuhuk sada halak pandingdingan.
5. Jengkar pe basiha ala pinahot ni parbatuna.
6. Songon basiha parsuhi si raja paniangi.
7. Songon tuhil pinasak ni laholaho.
8. Nangkohan balatuk, suruhon tohang.
9. Loting ma di tomboman, tondinta masigomgoman.
10. martangga martordingan songon paranak ni balatuk.
11. Ndang tuktuhan batu dakdahan simbora, ndang tuturan datu ajaran namarroha.
12. matrogu ni buaton, pinatamue jala pinaraja.
13. dlna
Umpasa/Silupsilupan.
1. Ungalungal sangkotan ni papene. Hata mungkangungkang, langka so malo hehe.
2. Tangkas pe jabu suhat, tangkasan do jabu bona. Tangkas ma namaduma, tangkas ma nang mamora.
3. Ruma inon gopas pe pinagopas ni gulanggulang. Ise pe boru tinodo ni ibebere, hot do i boru ni tulang.
4. Bolon tiang ni ruma, umbolon do tiang ni sopo. Matangkang ma juara natuatua, tu banggalna ma naumposo.
5. Tarup ijuk jabunami, ri namasak panoloti. Pandokhon ni soroniari, so holing marsiakbagi.
6. Dibungkulan ni ruma i, parasaran ni borongborong. Bulan na diginjang i, pardomuan ni simalolong.
7. Jongjong ruma ijuk, maradophon ruma gorga. Tubu anak nabisuk dohot boru naulibasa.
8. Songgop ma anduhur titi, sangkot diparjenggaran. Mangasi ma Mulajadi, unang adong abor lias ma parmaraan.
9. hau sibanebane dongan ni sibandaulu. Begu so ra mangalele, musu pe so jadi mamunu.
10. Giringgiring gostagosta sangkot dipandingdingan. Sahala mangiringiring, mangompaompa, manjampi parsaulian.
11. Rimpur jala hibul do hau sibaenon bungkulan ni ruma. Tomburan do ianggo boru, panungkunan ma hulahula.
12. Hot ma diparbatuna, togu diransangna. Momos ma ijuk di pangarahutanna, gopas di solangsolangna. Jumadi jabu namarampang namarjual sigomgom pangisina. Hasorangan ni anak sibulangbulangan dohot boru namartua.
13. dht udutna.

3 komentar:

  1. Memang namalo do halak batak on, pajongjong sopo (jabu) adong sude artina ate'

    BalasHapus
  2. Imada, asa lam holong rohanta tu budaya dan warisan leluhur ta, na tung mansai uli jala denggan i.

    BalasHapus
  3. Mauliate tmbh pengetahuan
    Bangga jdi batak

    BalasHapus